Integratex, como empresa integrada en COGAMI Empresarial, participou na reunión anual de xerencias que este ano se celebrou en Lugo e tivo a Grafinco, imprenta do Grupo empresarial, como anfitrioa.
Na reunión, as distintas empresas fixeron un balance dos logros do ano 2024 na comercialización de produtos e servizos, así como dos principais retos e compromisos de cada empresa de cara ao ano 2025.
No caso de Integratex pechamos o ano cun lixeiro incremento na facturación, ano no que abordamos a implantación dun sistema de xestión RFID, que nos permite unha xestión máis eficiente dos inventarios e de optimización do traballo e da rendibilidade de cada tenda. Ademais, no 2024 continuamos apostando polo escaparatismo dos establecementos outlet que xestionamos, mellorando as zonas de descanso e convivencia das nosas persoas traballadoras e incrementando a nosa relación con entidades e empresas que, coma nós, entenden o traballo desde unha visión da Economía Social.
Esta reunión tamén permitiu un intercambio de aprendizaxes e experiencias entre as empresas de COGAMI Empresarial e a oportunidade de reforzar o noso compromiso como Centros Especiais de Emprego de Iniciativa Social (CEEIS) ante as necesidades comúns como a captación e retención de talento, a formación enfocada á mellora continua ou a aposta pola sostibilidade ambiental. COGAMI Empresarial integra, ademais de a Integratex e Grafinco, ás empresas Accede Social (transporte de persoas), Combina Social (servizos de outsourcing), Coregal (xestión de residuos), Dixardín (deseño e mantemento de parques e xardíns), Hornos de Lamastelle (alimentación) e Trameve (automoción), baixo a coordinación de Galega de Economía Social, empresa matriz do Grupo Empresarial.
